Posted by کابل : د رارسیدلو خبرونو پر اساس د بهرنيو چارو وزير ډاکتر زلمى رسول په يوه رسمي سفر نن پاکستان ته سفر کوی.
په کابل کې د پاکستان سفارت د مطبوعاتي دفتر اعلامیه وایی، چې د افغانستان د بهرنيو چارو وزير ډاکتر زلمى رسول له يوه لوړ پوړي پلاوي سره سبا اسلام اباد ته ځي.
سرچينې زياته کړې، چې نوموړي ته د دغه سفر بلنه د پاکستان د بهرنيو چارو وزيرې حنا رباني کهر ورکړې ده.
په خبرپاڼه کې راغلي، چې د دغه سفر پر مهال به ډاکتر زلمى رسول له پاکستاني مشرانو سره د دواړو هېوادونو ترمنځ په اړوند موضوعاتو خبرې وکړي.
د افغانستان د بهرنيو چارو وزارت مطبوعاتي دفتر هم اسلام اباد ته د ډاکتر زلمي رسول سفر تاييد کړى دى.
د بهرنيو چارو وزير په داسې حال کې پاکستان ته ځي، چې د سولې د عالي شورا مشر صلاح الدين رباني هم له يوه لوړ پوړي پلاوي سره شاوخوا دوه اونۍ مخکې اسلام اباد ته تللى و او له پاکستاني چارواکو سره يې د سولې پر پروسې خبرې اترې کړې وې.
د دغه سفر پر مهال پاکستاني چارواکو د سولې د پروسې د پرمختګ لپاره د منځنۍ کچې ٩ تنه طالب بنديان خوشې کړل.