کابل:- د جمهوری ریاست د خبرپاڼې پر اساس، جمهوررئیس حامدکرزي د لغمان ولایت د الینګار ولسوالۍ د نورلام صاحب درې د شهیدانو له ورثوو سره د کتنې پرمهال هغوی ته یو ځل بیا د خپلې ژورې خواخوږۍ او ډاډګیرنې مراتب وړاندې کړل.

په دغه کتنه کې چې نن غرمه په ارګ کې ترسره شوه، د هېواد جمهوررئیس د نورلام صاحب په دره کې د نړیوالو ځواکونو د ورستۍ هوایي بمبارۍ له امله ملکي وګړو هغه هم یو شمېر میرمنو او نجونو ته پر اوښتې مرګ ژوبلې باندې خواشیني څرګنده کړه، وې ویل: ما تل له امریکایي چارواکو سره په کتنو او نړیوالو غونډوکې په دې باندې ټینګار کړی چې ترهګري د افغانستان په کلیو او بانډو کې نشته، باید ترهګري د افغانستان له پولو څخه د باندې په نخښه شي.

حامدکرزي وویل: د نړیوالو ځواکونو په پوځي عملیاتو کې یې د ملکي وګړو د سر او مال په خوندي ساتلو باندې په وار وار ټینګار کړي او په دې باب یې له امریکایي چارواکو او حتی تیره چهارشنبه یې د امریکا له ولسمشر بارک اوباما سره د ویدیو کنفرانس له لارې خبرې کړي چې هغوی ورته له دا ډول پیښو څخه د مخنیوي ډاډ ورکړی دی.

د هېواد جمهوررئیس په دغه کتنه کې د چارو د ادارې لوی رئیس صادق مدبر ته لارښوونه وکړه چې د نورلام صاحب د درې د شهیدانو له ورثوو سره لازمې مرستې وکړي.

په دې کتنه کې د شهیدانو د ورثوو په استازیتوب مولوي صراحت الله خبرې وکړې او د هېواد د جمهوررئیس د خواخوږۍ له څرګندولو او له دغې پیښې څخه وروسته په سمدستي ډول یې د شهیدانو له ورثوو سره د ټلیفون له لارې د هغه له خبرو کولو او سیمې ته د یو پلاوي د استولو له امله مننه وکړه.

مولوي صراحت الله د دا ډول پیښو په مخنیوي باندې د ټینګار په ترڅ کې وویل: د نورلام صاحب دره یوه غرنۍ سیمه ده او خلک یې خپلې ټولې اقتصادي ستونزې له غره څخه د لرګیو، وښو او جالغوزو د راوړلو او مالدارۍ له لارې حلوي نو که چیرې د نړیوالو ځواکونو لخوا پر موږ باندې کله په یوه نوم او کله هم په بل نوم بمبارۍ کیږي موږ مجبوره یو چې خپل کور کلی پریږدو.

مولوي صراحت الله د دغې پیښې د عاملینو او د ناسمو معلوماتو د ورکوونکو د محاکمې غوښتنه وکړه.

بیا په قومي چاروکې د جمهوررئيس سلاکار او سیمې ته د لیږل شوي پلاوي مشر شجاع الملک جلاله جمهورریس ته د دغې پیښې په اړه معلومات ورکړل، وې ویل چې د روان کال د وږي د میاشتې پر ۲۶ شپه امریکایي ځواکونو په هغو نجونو او میرمنو چې یو شمېر یې د ښوونځي زده کوونکې هم وې او غره ته د جالغوزو د راوړلو لپاره روانې وې، بمباري کړې چې له امله یې اووه نجونې او یو هلک شهیدان او۱۵ میرمنې ټپیانې شوې.

جلاله وویل: په ختیځ زون کې د امریکایي ځواکونو مسوول له استول شوي پلاوي سره دکتنې پرمهال د دغې پیښې رامنځته کیدل یوه تخنکي تیروتنه وبلله او د سیمې له خلکو او پلاوي څخه یې بخښنه وغوښتله.

د دغې کتنې په پای کې د افغانستان د جمهوررئیس د حکم له مخې د شهیدانو او ټبپیانو له کورنیو سره نغدي مرسته هم وشوه.