خوست ښار:- دا څرګندونې دخوست ولايتي شورا ريس او د همدې شورا غړو له يو شمېر رسنيو سره په ډاګه کړې.

د ولايتي شورا رئيس ښاغلي سېدکريم خان خاکسارپه خپلو خبرو کې په يو شمېر وزارتونو  نيوکه وکړه،چې دخوست ولايت په ځينو بنسټيزو پروژو کې د کمېشن کارۍ له مخې معاملې کوي او نه غواړي، چې يادې پروژې  پرتله معاملو څخه په دې ولايت کې پيل او پلي شي.

د نوموړي په خبره د تېرو دوو کالونو راپدېخوا دخوست د ملکي  نړيوال هوايي ډګر تاسيسات، ځغاست ليکه(رن وې) او نور اړين ملحقات د بودجې په شتوالي کې  د پردې ترشاه د پټو معاملو له کبله په ټپه ولاړ دي او لا هم مالومه نده، چې د ټرانسپورت او هوايي چلند وزارت به تر کومې پورې پدغه پروژه کې روانو معاملو ته ادامه ورکوي.

د ولايتي شورا ريس او غړي وايي، چې نږدې مياشت وړاندې يې د خوست د لسګونو قومي مخورو مشرانو په ملتيا د ولسمشر ښاغلي حامدکرزي سره د ارګ په ماڼۍ کې ليدنه کړي او خپلې ټولې ستونزې، غوښتنې ، اړتياوې او په وزارتونو کې نيمګړتياوې يې يو په يو په ګوته کړي او غوښتنه يې کړي، چې نور د ې دخوست ولايت پروژې او قراردادونه له معاملو راخلاص شي.ددوى په خبره چې پدغه ليدنه کې ناستو وزيرانو د ولسمشرپه وړاندې ټينګې ژمنې وکړې او پدې برخه کې يې د عملي اقداماتو تيارى وښود.چې پدې ډله کې يو هم د ټرانسپورت وزير وو، چې د جمهورريس په وړاندې يې په خوست کې د ملکي نړيوال هوايي ډګر د کارونو د پيل ژمنه وکړه، چې د پخوا په څېر يې دغه وروستۍ وعده هم په مياشت واوښته، خو لا هم د پروژې د پيل درک نشته.

همداشان دوى د خوست –ګردېز سړک، صنعتي پارکونو، د اوبو ذخيروي بندونو،وارداتي برېښنا، ټرانزيټ او د نورو ورته پروژو په هکله ګواښ وکړ، چې که چېرې  ياد وزارتونه او اړونده ادارې يې خپلې پخوانۍ او همداراز د ولسمشر په وړاندې کړي ژمنې ژر ترژره په عملي ډول پلي نه کړي، نو خپل غږ  او شکايتونه به بيا هم مخامخ ولسمشر او ملي شورا  ته ورورسوو او ممکن د ولسمشرۍ ماڼۍ او ملي شورا مخې ته په لاريونونو لاس پورې کړو.

داپداسې حال کې ده، چې دخوست –ګردېزسړک د تېرو اوو ((٧)) کالونو ، هوايي ډګر د تېرو دوو  او نورې يادې پروژې د اتو او لسو کالونو راپدېخوا په هوايي ژمنو ولاړې دي، خو لا يې هم ساختماني چارې نيمګړي او په ټپه ولاړې دي.

١٣٩٢-٥-١٤

دوشنبه