اسلام اباد: د امریکا په بې پیلوټه هوایي برید کې د القاعدې د يوه مهم غړي اسلم اعوان د وژنې خبر ورکړل شوى دى.

د پاکستان د يوه خبري اژانس د راپور له مخې، امريکايي چارواکي ادعا لري، چې د القاعدې دغه مهم قوماندان پر شمالي وزيرستان د روانې زېږديزې مياشتې په لسمه، يوه هوايي بريد کې وژل شوى دى.

راپور کې راغلي، چې د يوه امريکايي چارواکي په وينا، اسلم اعوان د خيبرپښتونخوا ايالت ايبټ اباد اوسېدونکى و او د عبدالله خراساني په نوم هم پېژندل کېده.

نوموړي چارواکي زياته کړې، چې اسلم اعوان په مصر هېواد کې د څه مودې لپاره د ډاکټر په توګه هم دنده ترسره کړې وه.

دغه خبر په داسې حال کې خپور شوى، چې د پاکستان دولتي او پولټيکلۍ چارواکو د القاعدې د دغه مهم غړي د وژنې تصديق نه دى کړى.

ويل کېږي، چې دغه بريد له ميران شاه څخه پنځه کيلومټره سوېل لوري ته په چشمه پل کې پر يوه کور ترسره شوى و، چې په ترڅ کې يې د درېيو عربي جنګياليو په ګډون ٤ تنه نور هم وژل شوي وو.

د يادونې وړ ده، چې په روانه اونۍ کې د امریکا په بې پیلوټه هوایي برید کې د پاکستان د طالبانو تحریک د مشر حکیم الله مسعود د وژل کېدو اوازې هم خپرې شوې وې.

د ایسوسي ایټډ په نوم امریکایي اژانس د مرغومي په ۲۵مه، د پاکستانيو استخباراتي سرچینو په حواله خبر ورکړی و، چې د پاکستانيو طالبانو د تحریک مشر حکیم الله مسعود د مرغومي په ۲۲مه، په امریکایي بې پیلوټه هوایي برید کې وژل شوی دی.

خو د پاکستانيو طالبانو د تحریک ویاند، رسنیو سره د خبرو پرمهال د حکیم الله مسعود وژنه رد او زیاته کړې وه، چې د بې پیلوټه هوایی برید پرمهال حکیم الله مسعود په هغې سیمه کې نه و.