په كونړ كې د نړيوالو ځواكونو ړندې بمبارۍ د افغان ولس د بيلابيلو لوريو توند غبرګونونه را و پارول، ولسمشر كرزي د دې بريد غندنه وكړه، ولسي جرګې سخت غبرګون وښود او د دې پيښې او دې ته ورته پيښو سپيناوى يې و غوښت ولس پرې خپه او له نړيوالې ټولنې او افغان چارواكيو نه نور هم ناراضه شو.

د ځينو راپورونو پر بنسټ دهمدې پيښې پر سر د ولسمشر كرزي او نړيوالو ځواكونو ترمنځ اختلاف هم راغلى دى، خو دغه مساله ولې يوازې د ولسمشر او ناټو ځواكونو ترمنځ د اختلاف سبب و بلل شي؟

كه ناټو ځواكونه او يا په مجموع كې نړيواله ټولنه دا هيله لري چې دوى به ړندې بمبارۍ كوي، دوى به د افغان ولس د كور، جومات او حجرې حريم تر پښو لاندې كوي، دوى چې هر څه كوي بايد ولس، ولسمشر او نور چارواكي چوپ وي، نو دا خو د افغانانو په فطرت كې نشته، دا يوازې د ولسمشر غبرګون نه دى، د ولسي جرګې وكيلان د كونړ د بمبارۍ په احتجاج كې د ولسي جرګې له غونډې ووتل، جرګې د دې پيښو سپيناوى وغوښت او زموږ ولس د دغسې پيښو د دوام له امله داسې غبرګون ته چمتو دى چې نړيوال به يې په خوب كې هم تصور و نه كړاى شي.

ښايي په افغانانو كې ډير لږ داسې كسان وي چې د كونړ په څېر په بې رحمانه بمبارۍ كې د مظلومو هېوادوالو پر شهادت سخت خپه نه وي او اعتراض و نه كړي.

دا به د ناټو او نړيوالې ټولنې شعوري او يا لا شعوري اشتباه وي چې پر دې مساله له حامد كرزي سره اختلاف ښيي، معنادا چې دوى د ولس پر اعتراض او توند غبرګون سترګې پټوي او د يوه ترخه واقعيت د مسووليت د منلو او د هغو د اساسي سمون پر ځاى مساله بيا هم يوه سياسي اختلاف ته بيا يي!!

واقعيت دادى چې له نړيوالې ټولنې نه په افغانستان كې لاره وركه ده، د دې پر ځاى چې خپله معقوله لاره و مومي خپل اهداف و ټاكي او له افغان ولس سره په همغږى ګامونه واخلي په تيارو كې ګوزارونه كوي، دهغو ناكامو تجربو تكرار ته اړم دي چې دوى يې د افغان ولس په نظر كې د مرستندويانو له مقامه د تيري كوونكيو دريځ ته را غورځولي دي.

د نړيوالې ټولنې وسله والو ځواكونو دافغانستان د دولت د ټولو كورنيو او بهرنيو مخالفينو كار آسانه كړى دى، كه همدغه ړندې بمبارۍ وي، كه همدغه له افغان دولت سره نه همغږي وي او همدغه نړيوال ځواكونه وي چې د دوست اودښمن له پيژندلو پرته خپلې وژونكې وسلې چلوي، طالب او القاعده ته هيڅ حاجت نشته چې له بل ځايه اكمال شي، يا له بل ځايه د بريد لپاره څوك و ګوماري، افغان ولس به كه په تش لاس وي هم له مجبوريته د دوى په وړاندې را پاڅي، په دې وروستيو كې د كونړ د پيښې په اړه د ولسي جرګې وكيلانو په يوه تلويزيوني بحث كې همدغه ګواښ كاوه او دا سل په سلو كې رښتيا هم دى.